दुवै पक्षको तानातानमा गौतम जुन धारमा उभिन्छन् त्यसैले संसदीय दलको नेतादेखि पार्टीको अध्यक्षसमेत बन्ने अवस्था छ ।काठमाडौ, माघ १३ - एमालेको आन्तरिक शक्ति सन्तुलनमा यतिखेर उपाध्यक्ष वामदेव गौतम निणर्ायक भूमिकामा देखिएका छन् । तत्काल चयन गर्नुपर्ने संसदीय दलको नेतादेखि आउँदो महाधिवशेनबाट को अध्यक्ष हुने भन्नेबारे निर्णय करिब गौतमको भूमिकाले निर्धारण गर्ने अवस्था छ । नेताहरूका अनुसार सर्वसम्मतिको प्रयास पनि जारी छ । प्रयास विफल भए दुवै पक्षको तानातानमा गौतम जुन धारमा उभिन्छन् त्यसैले संसदीय दलको नेतादेखि पार्टीको अध्यक्षसमेत बन्ने अवस्था छ ।
पार्टीभित्र अहिले स्पष्ट रूपमा अध्यक्ष झलनाथ खनाल र माधव नेपालको एउटा समूह बनेको छ भने अर्को समूहमा नेता केपी ओली र महासचिव ईश्वर पोखरेल छन् । गौतम आफैं खनाल-नेपाल समूहसँग निकट सम्बन्ध राख्छन् । तर संसदीय दलको नेतादेखि महाधिवेशनसम्मको समीकरणमा उनलाई ओली समूहले पनि आफूतिर ल्याउन बल गरिरहेको छ ।
'सभासदको एउटा हिस्सा उहाँको पछाडि छ र आगामी महाधिवेशनमा पनि उल्लेख्य प्रतिनिधि आउने अवस्था छ,' गौतम निकट एमाले नेता केशवलाल श्रेष्ठले भने, 'त्यसैले पनि उहाँको भूमिका महत्त्वपूर्ण र निणर्ायक बनेको हो ।' नेताहरूका अनुसार एमाले संसदीय दलमा झन्डै डेढ दर्जन गौतम निकटका सभासद छन् । संसदीय दलभित्र कुन नेतालाई जिताउने वा हराउने भन्नेमा यो संख्या निणर्ायक हो । माले पृष्ठभूमिका कारण संगठनमा गौतमको केही पकड छ । एमालेमा एकीकरण भएपछि पनि उनले भ्रातृसंगठन अखिल नेपाल किसान महासंघलाई आफ्नो संगठनात्मक शक्ति विस्तार गर्न प्रयोग गरे । त्यसैले महाधिवेशन प्रनितिनिधि छनोट हुँदा निर्वाचनबाटै माले पृष्ठभूमिका प्रतिनिधि आउने अवस्था रहन्छ । गौतमको यो शक्तिलाई पार्टीका अन्य नेताले पनि बुझेका छन् ।
